અમેરિકન ફિલ્મ ઉદ્યોગને નવા જીવન આપવાના પ્રયાસમાં, રાષ્ટ્રપતિ ડોનાલ્ડ ટ્રમ્પે મહત્વપૂર્ણ પગલું ભર્યું છે. તેમણે જાહેરાત કરી છે કે યુએસની બહાર બનેલી તમામ વિદેશી ફિલ્મો પર હવે 100 ટકા ટેરિફ લાગુ થશે. ટ્રમ્પનું માનવું છે કે વિદેશી ફિલ્મો અમેરિકન ઉદ્યોગને નબળું બનાવી રહી છે અને આ સ્થિતિ રાષ્ટ્રીય સુરક્ષાને પણ ધમકીરૂપ છે.
ટ્રમ્પે જણાવ્યું કે, “અમેરિકન ફિલ્મ ઉદ્યોગ ઝડપથી નાશ પામી રહ્યો છે. આ અન્ય દેશોનો સંયુક્ત પ્રયાસ છે.” તેમણે સ્થાનિક ફિલ્મ નિર્માણને પુનઃજીવિત કરવાને અનિવાર્ય ગણાવ્યું અને ઉમેર્યું કે, “અમે ઈચ્છીએ છીએ કે ફિલ્મો ફરીથી અમેરિકામાં બને.”
આ નિર્ણયનો મુખ્ય હેતુ અમેરિકન સ્ટુડિયોને સ્થાનિક સ્તરે કામ કરવા માટે પ્રોત્સાહિત કરવાનો છે અને રમતનું મેદાન સમાન બનાવવાનો છે. ઉપરાંત, ટ્રમ્પે સાન ફ્રાન્સિસ્કોની અતિચર્ચિત અલ્કાટ્રાઝ જેલને ફરીથી ખોલવાની યોજના પણ જાહેર કરી છે. તેમણે જેલનું નવીનીકરણ અને વિસ્તાર કરવાની સૂચના આપી છે.
અલ્કાટ્રાઝ એક સમયના સૌથી કુખ્યાત ગુનેગારો માટે જાણીતી જેલ હતી, જે 1963માં બંધ થઈ ગઈ હતી. ટ્રમ્પે સ્પષ્ટ શબ્દોમાં જણાવ્યું કે, “જ્યારે અમેરિકા વધુ ગંભીર રાષ્ટ્ર હતું, ત્યારે આપણે જાણતા હતા કે સૌથી ખતરનાક ગુનેગારોને કેવી રીતે અલગ કરવા. હવે તેને પાછું લાવવાનો સમય આવી ગયો છે.”
